Բարդ
համակարգերը, մասնավորապես տեղեկատվության մշակման և կառավարման
ավտոմատացված համակարգերը (ԱՀ) գործում են տարաբնույթ պատահական
գործոնների ազդեցության ներքո, որի հետևանքով համակարգի գործունեության
գործընթացը կրում է հավանականային բնույթ: Նման գործընթացների բնութագրերի
գնահատումը և ուսումնասիրումը իրականացվում է կիրառական վիճակագրության և
հավանականային գործընթացների հետազոտման մեթոդներով: Այդ մեթոդները
հատկապես լայն կիրառություն են գտել բարդ տեխնիկական համակարգերի
հավանականային նմանակային (քոմփյութերային) մոդելավորման բնագավառում,
ինչը կարևորում է կիրառական վիճակագրության և հավանականային գործընթացների
հետազոտման ճարտարագիտական մեթոդների վերաբերյալ անհրաժեշտ գիտելիքների և
գործնական հմտությունների ձեռքբերումը: